Bu gün Bakı Apellyasiya Məhkəməsində Ann.tv saytının əməkdaşı Rasim Əliyevin döyülərək öldürülməsi işi üzrə həbs edilən "Qəbələ” klubunun sabiq kapitanı Cavid Hüseynov barəsində olan hökmdən verilən apellyasiya şikayəti üzrə məhkəmənin ilkin baxış iclası keçirilib.
Sportnet.az-ın "Report”a istinadən məlumatına görə, hakim Həsən Əhmədovun sədrliyi ilə keçirilən prosesdə C.Hüseynovun vəkili Adəm Məmmədov vəsatətlə çıxış edib.
O, çıxışında məhkəmənin qismən istintaqla aparılmasını və şahid Aydın Mahmudovun məhkəmədə ifadə verməsini istəyib. Vəsatət təmin edilməyib.
Məhkəmənin baxış iclası avqustun 12-nə təyin edilib.
Qeyd edək ki, Cavid Hüseynov mayın 31-də Səbail Rayon Məhkəmənin hökmü ilə 4 il müddətinə azadlıqdan məhrum edilib.
