Avropa Liqasının III təsnifat mərhələsində "Neftçi"yə qarşı keçirdikləri ilk oyundan sonra Gürcüstanın "Çixura" klubunun futbolçusu Georgi Kimadze fikirlərini bölüşüb. Sportnet.az-a açıqlamasında 21 yaşlı yarımmüdafiəçi Bakıda istəklərinə nail olduqlarını bildirib.
Kimadze deyib: "Oyun gərgin keçdi. Hər iki komanda cəhd etdi, lakin alınmadı. Əslində bizim hədəfimiz Bakıda məğlub olmamaq idi. Ona da nail olduq. İndi qalır cavab oyunu. Həmin oyunda isə evdə oynayacağıq deyə üstünlük bizdə olacaq”.
Qeyd edək ki, "Neftçi" - "Çixura" matçı qolsuz başa çatıb - 0:0. Cavab görüşü avqustun 7-də Tiflisdə olacaq.
