"Qəbələ”nin kapitanı Rəşad Sadiqov Belçikada "Anderlext"lə keçirəcəkləri Avropa Liqasının qrup mərhələsinin ilk tur matçı barədə fikirlərini bölüşüb.
Sportnet.az-ın məlumatına görə, təcrübəli yarımmüdafiəçi oyunöncəsi mətbuat konfransında oyunun çətin alınacağını bildirib. O, mövqeyini rəqibin "Anderlext” olması ilə əsaslandırıb: "Bu komandanın necə təcrübəli olması hamıya məlumdur. Onlar Çempionlar Liqası və Avropa Liqasının qrupunda kifayət qədər çıxış ediblər. Buna baxmayaraq, biz də iddialıyıq. Meydana 3 xal üçün çıxacağıq. Çalışacağıq ki, qalib gələk. Bakıya ən azı xalla dönmək niyyətindəyik. Qrup mərhələsində ilk oyunumuzdur. Yaxşı nəticə ilə başlamalıyıq ki, davamı da gəlsin”.
Qeyd edək ki, Brüsseldəki "Konstant van den Stok" stadionunda keçiriləcək görüş Bakı vaxtı ilə saat 21:00-da başlanacaq.
