"Qarabağ"ın kapitanı Rəşad Sadıqov Avropa Liqasında ardıcıl 2-ci oyundur meydanı qolsuz tərk etmir. Sportnet.az-ın məlumatına görə, pley-off mərhələsində İsveçin "Göteborq" klubuna Tofiq Bəhramov adına Respublika stadionunda 3:0 hesabı ilə qalib gəldikləri cavab oyununda fərqlənən 34 yaşlı müdafiəçi bu dəfə turnirin qrup mərhələsində Çexiya "Slaviya"nının qapısına "Dalğa Arena"da yol tapıb - 2:2.
Bununla da Sadıqov avrokuboklarda 7-ci qoluna imza atıb və bombardirlər yarışında 2-ci yerdə gedən braziliyalı komanda yoldaşı Riçard Almeydaya və adaşı Rəşad Sadiqova çatıb. Lider isə elə "Qarabağ"n braziliyalı hücumçusu Reynaldo Silvadır. Onun hesabında 10 qol var.
Avrokuboklarda ən çox oyun keçirən futbolçumuz olan Rəşad növbəti qolunu yubiley - 50-ci matçında vurub. O, 7 qoldan 5-ni 2009-cu ildən şərəfini qoruduğu "Qarabağ"da, 2-ni isə daha öncə çıxış etdiyi "Neftçi"də imza atıb.
Sadıqovun ispaniyalı yoldaşı Migel Madera isə "Qarabağ"ın heyətində avrokuboklarda qol hesabını açıb. "Qəbələ"nin "Anderlext"ə səfərdə 1:3 hesabı ilə uduzduğu qarşılaşmada yeganə qolunu vuran fransalı hücumçusu Baqali Dabo isə qrupda ilk dəfə fərqıənib. O, bu yay gəldiyi "qırmızı-qaralar"da daha öncə dubl müəllifi olub. Artıq 3-cü qoluna imza atan Daboya da "Dalğa Arena"da düşərli olub. O, pley-off mərhələsində Sloveniyanın "Maribor" klubuna 3:1 hesabı ilə qalib gəldikləri ilk oyunda həmin stadionda 2 qol vurub.
Mehman SÜLEYMANOV
