"Mən, Ruslan Abışov və Mirhüseyn Seyidov məhkəməyə getmişdik. Cavidi cəmi bir neçə saniyəlik gördük". Bunu Sportnet.az-a açıqlamasında "Qəbələ"nin həbsdə olan sabiq üzvü Cavid Hüseynovun məhkəməsində iştirak edən "Qarabağ"ın futbolçusu Qara Qarayev deyib.
Yarımmüdafiəçi Hüseynovla görüşməyin mümkün olmadığını, lakin ona dəstək verdiklərini bildirib: "Onu məhkəməyə gətirəndə gördük. Biz ona yanında olduğumuzu, dəstəyimizi bildirdik. Doğurdan da çox ağır mənzərədir. İnanıram ki, Cavidin günahsız olduğu sübuta yetiriləcək və azadlığa buraxılacaq. Bundan sonra o həm "Qəbələ", həm də millimizə xeyir verə biləcək".
Q.Qarayev uzun müddətdir həbsdə olan Hüseynovun azadlığa çıxacağı təqdirdə əvvəlki formasına qayıtmasının çətin olmayacağını vurğulayıb: "Cavid psixoloji baxımdan çox möhkəmdir. Sadəcə indiki forması onun futbol oynamasına mane olar. Ancaq o da məşqlərdən sonra özünü yenidən bərpa edib meydanda olacaq. Dualarımız onunladır. Arzu edirəm ki, dəmir barmaqlıqlar arxasında olan hər bir kəsin qapısı açılsın. Həbsxana həyatı çox çətindir. Heç kimin bu vəziyyətə düşməsini arzulamaram".
