Azərbaycanlı futbolçu 17 illik fasilədən sonra Portuqaliya çempionatının yüksək liqasında meydana çıxıb.
Sportnet.az-ın məlumatına görə, bu, həmin ölkənin Premyer Liqasında yeganə təmsilçimiz olan Vəli Qasımovdan sonra Kamran Ağayev olub. Millimizin 30 yaşlı qapıçısının yeni keçdiyi "Boavişta"nın heyətində "Portu"ya qarşı səfər matçı 1:3 hesablı məğlubiyyətlə nəticələnib.
Qasımovun Portuqaliyada karyerası 2 klubla bağlı olub. Bunlardan "Vitoriya Setubal" (1997 - 1999-cu illər: 41 oyun, 15 qol) yüksək liqa təmsilçisi olubsa, karyerasını bitirdiyi "İmortal" aşağı dəstədə (1999 - 2001-ci illər: 46 oyun, 16 qol) çıxış edib. Keçmiş hücumçu 24 oyunda vurduğu 11 qolla "Vitoriya Setubal"da debüt mövsümündə bombardir olub. Qasımov karyerasını 33 yaşında Portuqaliyanın III divizionunda bitirib. Onun yüksək liqada son matçında isə komandası evdə "Akademika"ya 1:0 hesabı ilə qalib gəlib. Bu, "Portu"nun çempion olduğu 1998/1999 mövsümündə - 1999-cu ilin mayın 30-da olub. Ağayev isə Portuqaliya Premyer Liqasında bundan 17 il sonra - 2016-cı il sentyabrın 23-də meydana çıxıb.
Qasımovla Ağayevin yolları millimizdə kəsişib. Bu da Vəli Qasımovun almaniyalı Berti Foqtsun baş məqçiliyi dövründə bir müddət onun köməkçisi işlədiyi vaxt olub. Ağayev elə millimizin heyətində Portuqaliya yığmasına qarşı səfərdə oynasa da, bu, "Portu"nun yox, "Braqa"nın stadionunda olub.
Xatırladaq ki, Kamran Ağayev bundan öncə Türkiyədə legioner həyatı yaşasa da, "Kayserispor"la (6 oyun) "Karşıyaka" (13 matç) I Liqa təmsilçiləri olub. O, Portuqaliya çempionatında oynayan ilk azərbaycanlı qapıçı kimi tarixə düşüb. 2014/2015 mövsümündə millimizin sabiq yarımmüdafiəçisi Amit Quluzadə də bu ölkədə çıxış edib. Amma onun 6 oyun keçirdiyi "Atletiko" II liqa təmsilçisi olub.
Mehman SÜLEYMANOV
