"Robert Prosineçki Çexiyadan bizimlə birgə Bakıya qayıtmadı. O, vətəni Xorvatiyaya yollandı".
Bunu Sportnet.az-a açıqlamasında Azərbaycan milli komandasının məşqçisi Mahmud Qurbanov deyib. Millimiz 2018-ci il dünya çempionatının seçmə mərhələsində son oyununu keçirdiyi Çexiya yığması ilə səfər matçından dərhal sonra vətənə dönsə də, baş məşqçi həmin heyətdə olmayıb.
Qurbanov xorvatiyalı mütəxəssisin qısa müddətə vətəninə getdiyini söyləyib: "Prosineçki həftəsonuna Bakıya qayıtmalıdır. Onun ailəsi burda yaşayır, övladları da paytaxtımızda məktəbdə oxuyur. Vacib işi olanda Xorvatiyaya baş çəkir. Boş-boşuna vətənində qalmır. Prosineçki heç vaxt ailəsini tək buraxmaq istəmir. Sadəcə, bu dəfə şəxsi işləri olduğundan, 2-3 günlük Xorvatiyaya evinə yollandı".
Millimizin çalışdırıcısının Azərbaycan Premyer Liqasının qarşıdakı turunun oyunlarını izləyəcəyi istisna olunmur. Qurbanov onun köməkçiləri olan həmyerlilərinin hazırda paytaxtımızda olduğunu söyləyib: "Yəqin ki, çempionat oyunlarında biz olacağıq. Prosineçki həmin vaxta çatsa da, özü də oyunlarda olacaq. Olmasa, biz köməkçiləri istənilən halda çempionat matçlarında iştirak edəcəyik".
Xatırladaq ki, çempionatda ikinci dövrənin ilk turunun qarşılaşmaları oktyabrın 15-16-da keçiriləcək.
Mehman SÜLEYMANOV
