"Kəpəz" Azərbaycan Kubokunun 1/4 final mərhələsinin "İnter” ilə səfər qarşılaşmasında müdafiəçi Şəhriyar Əliyevlə yanaşı daha iki futbolçunun xidmətindən məhrumdur. Sportnet.az-ın məlumatına görə, yarımmüdafiəçilər Dario Federiko ilə Kərim Diniyev Bakıdakı sabahkı qarşılaşmada komandaya kömək edə bilməyəcək.
Uzun müddət zədəli olan braziliyalı legioner oyuna tam hazır deyilsə, Diniyev xəstələnib. Soyuqlayan Kərim son iki gündə məşqlərdə iştirak etməyib.
Bu itkilərin fonunda mərkəz müdafiəçilərinin sıraya dönüşü məşqçilər korpusunu sevindirir. Ölkə kubokunda zədə səbəbindən öncəki mərhələdə "Şahdağ”la görüşü buraxan Azad Kərimovla braziliyalı Renan Alves ötən həftədən məşqləri bərpa edib. Onların paytaxt təmsilçisi ilə matçda meydana çıxması mümkündür.
