Futbol üzrə Avropa Liqasında 2016-2017 mövsümünün qalibi müəyyənləşib.
Sportnet.az-ın məlumatına görə, bu, İngiltərənin "Mançester Yunayted" klubudur.
Joze Mourinyonun baş məşqçi olduğu komanda İsveçin paytaxtı Stokholmdakı "Friends Arena"da keçirilmiş final oyununda Hollandiya "Ayaks"ına qalib gəlib. Qolları Pol Poqba və Henrik Mxitaryan vurub.
Bununla da "Mançester Yunayted" 9 ildən sonra ilk dəfə Avropa kubokuna sahib olub. Sonuncu dəfə "qırmızı şeytanlar" 2008-ci ildə Çempionlar Liqasının və klublararası dünya çempionatının qalibi olublar. Mourinyo isə "Portu" (Portuqaliya) və "İnter" (İtaliya) komandalarına qazandırdığı qitəmiqyaslı mükafatlardan sonra İngiltərədə də ilk belə kuboka yiyələnib. O, "Portu"ya 2003-cü ildə UEFA Kuboku, 2004-cü ildə Çempionlar Liqasını, "İnter"ə isə 2010-cu ildə Çempionlar Liqasını qazandırıb.
------------------------------------------
Bu gün futbol üzrə Avropa Liqasının qalibi müəyyənləşəcək.
Sportnet.az-ın məlumatına görə, İsveçin paytaxtı Stokholmdakı "Friends Arena"da keçiriləcək final matçında İngiltərənin "Mançester Yunayted" və Hollandiyanın "Ayaks" komandaları üz-üzə gələcək.
Amsterdam təmsilçisi son 21 ildə ilk dəfə avrokubokların həlledici oyununa çıxacaq. Ümumilikdə isə iki komanda finallarda üst-üstə 16 dəfə iştirak edib. "Ayaks" 7 dəfə kuboka yiyələnibsə, "Mançester Yunayted"də bu göstərici 4 olub. "Qırmızı şeytanlar" bu dəfə qalib gəlsələr, ilk dəfə Avroliqanın baş mükafatını qazanacaqlar. Eyni zamanda bu komanda bütün 3 Avropa kubokuna - Çempionlar Kuboku (hazırkı Çempionlar Liqası), UEFA Kuboku (Avropa Liqası) və hazırda mövcud olmayan Kuboklar Kubokuna yiyələnən 5-ci komanda sayılacaq. Əvvəllər bu, 4 kluba nəsib olub ki, onlardan biri də "Ayaks"dır.
Qeyd edək ki, bugünkü oyun Mançesterdə törədilmiş terror aktı qurbanlarının xatirəsinin anımı məqsədilə 1 dəqiqəlik sükutla başlanacaq.
Avropa Liqası
Final
22:45. "Ayaks" (Hollandiya) - "Mançester Yunayted" (İngiltərə) - 0:2
Qol: Pol Poqba, 18. Henrik Mxitaryan, 47
Baş hakim: Damir Skomina (Sloveniya)
Stokholm, "Friends Arena"
