"Bu, Avropa Liqası matçları ərəfəsində başlıca repetisiya idi. Yaxşı komanda ilə qarşılaşdıq, futbolçularımız özlərini yaxşı tərəfdən göstərdilər. Baxımlı futbol sərgilədik, qol vəziyyətləri yaratdıq. Demək olar ki, toplanışda ən yaxşı oyunlarımızdan birini keçirdik".
Sportnet.az-ın məlumatına görə, bunu Bakı "İnter"inin baş məşqçisi Zaur Svanadze Türkiyənin Bolu bölgəsində Rumıniya "Viitorul"una 2:1 hesabı ilə qalib gəldikləri son yoxlama matçından sonra deyib.
Gürcüstanlı mütəxəssis toplanışdan razı qaldığını bildirib: "Uşaqlar taktiki tapşırıqları yerinə yetirdilər.
Toplanış məhsuldar keçdi. Birinci və ikinci oyunları yükləmələr fonunda keçirdik. Uşaqlar məşqlərdə vicdanla hazırlaşdılar. Toplanış barədə ümumi qiymət müsbətdir. Yaratdığı şəraitə görə klub rəhbərliyinə təşəkkürümü bildirirəm. Bundan sonra Avroliqa oyunlarınadək hazırlığımızı Bakıda davam etdirəcəyik".
Qeyd edək ki, "İnter" Bakıya bu gün qayıdacaq.
