"Karluş Apna Embalo adlı futbolçu ilə danışıqlar aparmırıq".
Bunu Sportnet.az-a açıqlamasında "Qarabağ"ın baş direktoru Əmrah Çəlikəl deyib. O, İtaliya "Palermo"sunda çıxış edən yarımmüdafiəçiyə heç bir təklif göndərmədiklərini bildirib: "Ola bilsin, hansısa menecer klubumuz adından Embaloya təklif göndərib. Amma bu futbolçu bizim maraq dairəmizdə deyil".
"Qarabağ" rəsmisi xatırladıb ki, Moldova "Şerif"i ilə keçirəcəkləri Çempionlar Liqasının III təsnifat mərhələsinin ilk oyununadək bir futbolçu transfer etmək imkanları var. Lakin o, yeni transfer olmadan da mərhələ adlamağa qadir olduqlarını vurğulayıb: "Hələlik kimisə transfer edib-etməyəcəyimizi bilmirəm. Amma hazırkı heyətlə də mərhələ adlamaq gücündəyik. Niyə də yox"?!
Qeyd edək ki, İtaliya mətbuatı Karluş Apna Embaloya "Qarabağ"ın sərfəli təklif ünvanladığını yazıb.
