"Qarabağ”ın yay transfer pəncərəsində heyətinə qatdığı Pedro Enriko artıq Bakıya gəlib. Sportnet.az-ın məlumatına görə, yeni transfer klubun rəsmi saytına açıqlamasında gələcək hədəfləri barədə danışıb.
"Qarabağ”a gəlməmişdən əvvəl komandanın uğurları və hədəfləri haqda maraqlandım. Komanda, azarkeşlər və Bakı haqda artıq məlumatım var. Bakı da olduqca gözəl şəhərdir. Klubun bazasıyla tanış oldum, burada futbolçu üçün hər cür şərait yaradılıb. Bakıya gəlməmişdən bir gün əvvəl də Riçard Almeyda ilə danışdım, o da kifayət qədər məlumat verdi" deyən braziliyalı vinger bildirib ki, keçmiş komandasının Yunanıstan PAOK-unun ötən mövsüm "Qarabağ”la Avropa Liqasının qrup mərhələsində üz-üzə gəlməsindən xəbərdardır: "Həmin ilin qışında Yunanıstan klubuna keçdim. "Qarabağ” Azərbaycan futbol tarixində Çempionlar Liqasının qrup mərhələsinə vəsiqə qazanan ilk klubdur. Mən də bura öz oyunumla komandama kömək etməyə gəlmişəm. Yarımmüdafiənin həm sağ, həm də sol cinahında oynaya bilirəm. Komandada rəqabətin olması hamımızın xeyrinədir. "Qarabağ” üçün əlimdən gələnin ən yaxşısını etməyə çalışacağam”.
Qeyd edək ki, Pedro Enrike PAOK-dan bir illik icarəyə götürülüb.
