Topaz Premyer Liqasının IX turunda "İnter”lə oyun zamanı "Səbail"in dalaşan futbolçuları Elton Yaqublu və Maudo Jarjue cəzalandırılıb.
Sportnet.az xəbər verir ki, bu barədə komandanın baş məşqçisi Samir Əliyev bildirib. Onun sözlərinə görə, hər iki futbolçuya pul cəriməsi kəsilib: "Klubun nizam-intizam kodeksinə uyğun olaraq, hər iki futbolçu cəzalanıb. Artıq həmin kağıza mən də qol çəkmişəm. Onlara pul cəzası verillib”.
Xatırladaq ki, "Səbail”in 1:0 hesabı ilə qalib gəldiyi oyunun sonlarında Elton Yaqublu ilə Maudo Jarjue arasında sərt mübahisə düşüb. Hətta onlar əlbəyaxa olublar. Araya girən "Səbail”in digər oyunçuları tərəfləri sakitləşdiriblər (qol.az).
