"Zirə" klubunun müqavilə bağlayacağı daha bir futbolçunun adı müəyyənləşib. Sportnet.az-ın məlumatına görə, bu, Makedoniya yığmasının və Çexiyanın "Bohemians" klubunun futbolçusu Yani Urdinovdur.
Belçikada doğulmuş Urdinov artıq Bakıdadır. 26 yaşlı cinah müdafiəçi tibbi müayinədən keçdikdən sonra 6 aylıq icarə müqaviləsinə imza atacaq. Urdinov yanvarın 31-də Türkiyənin Antalya bölgəsindəki təlim-məşq toplanışında "Bohemians"ın heyətində "Qəbələ"yə qarşı 70 dəqiqə oynayıb. Onun start heyətində meydana çıxdığı qarşılaşmadan klubu 3:1 hesablı qələbə ilə ayrılıb.
Qeyd edək ki, Yani Urdinov karyerası ərzində Makedoniyanın "Rabotniçki", "Şkendiya", Albaniyanın "Flamurtari", Hollandiyanın "Roda", Litvanın "Ekranas", Bosniya və Herseqovinanın "Jelezniçar", Polşanın "Vizdev" və Çexiyanın "Vısoçina" klublarında da çıxış edib. O, 2012-ci ildən dəvət almağa başladığı Makedoniya yığmasının heyətində 5 oyuna çıxıb. Urdinov müdafiənin mərkəzində də oynayır ("Report").
