"Rəqibi təbrik edirəm. Məğlub olsaq da, komandamın oyunundan razı qaldım. Meydanda yaxşı futbol izlədik. Hər halda, mübarizə var idi. Məğlub olmaq istəmirdim. Komandada qalib əhval-ruhiyyəsini qoruyub saxlamaq lazımdır. Neçə oyundur uduzmurduq. Buna görə, komanda daxilində bir həyəcan var idi ki, hər an uduza bilərik".
Sportnet.az xəbər verir ki, bunu "Qarabağ"ın baş məşqçisi Qurban Qurbanov evdə "Neftçi"yə 0:1 hesabı ilə uduzduqları Topaz Premyer Liqasının XXVI tur matçından sonra mətbuat konfransında deyib. 46 yaşlı mütəxəssis jurnalistlərin suallarını da cavablandırıb...
- Coşqun Diniyevin əvəzlənməsi qol epizodunda yol verdiyi səhvə görə idi?
- Qoldan başqa da bəzi səhvləri var idi. Buna görə də eyni səhvlərin təkrarlanmaması üçün onu əvəzlədim.
- Riçard Almeydanın oynamamasının səbəbi nə idi?
- O, həm zədəlidir, həm də sarı vərəqəsi var idi.
- Dino Ndlovu diktaror olduğunuzu deyib. Onun fikirləri sizi əsəbləşdirmir?
- Bunları pis fikir kimi qiymətləndirməzdim. Bu, klubun kodeksində də yazılıb ki, futbolçu intizamlı olmalıdır. Şəxsi həyatına da diqqət yetirməlidir. Fikrimcə, bu, kluba verilən dəyərdir. Elə futbolçularımız var ki, oyun səviyyəsi hərdən aşağı düşür. Onlara nəzarət etmək lazımdır.
- Futbolçuların şəxsi həyatına nəzarət sırf sizin üzərinizdədir?
- Bu barədə məlumat verə bilmərəm.
- Dmitri Bezotosnının milliləşdirilməsi ilə bağlı məlumatlar nə dərəcədə həqiqətəuyğundur?
- Bu barədə mənim məlumatım yoxdur. Ancaq hansısa mövqedə problem olsa, ola bilsin, bu addımı nə vaxtsa ata bilək.
- "Qəbələ” ilə son turdakı oyunun Bakıda keçirilməsi ehtimalı var...
- Bu barədə məndə heç bir məlumat yoxdur.
- Oyunun sonunda Ramil Şeydayev və Miçel arasında gərginlik yaşandı...
- Mən belə bir şey görmədim. Hamı burda öz yerini bilir. Futbolçular özündən böyüyə hörmət edirlər. Məncə, ciddi heç nə yoxdur.
- Çempionluğu təmin etmisiniz. Ola bilərmi ki, bəzi legionerləri vaxtından əvvəl istirahətə göndərəsiniz?
- Ola bilsin, milli komandanın üzvlərini bir qədər tez icazə verdim.
