Avropa Liqasının qrup mərhələsində "Qarabağ"ın rəqibi olan İtaliyanın "İnter" klubu qışda heyətini gücləndirəcək. Sportnet.az-ın məlumatına görə, Milan təmsilçisinin hazırkı heyətinin sərgilədiyi oyun prezident Erik Tohiri qane etmir.
Baş məşqçi Valter Matsarini postunda saxlayan indoneziyalı biznesmen qış transfer pəncərəsində komandaya yeni oyunçular cəlb edəcəyini bildirib: "Matsari ilə yola davam edəcəyik. Bu, öz yerində. Ancaq komandanın oyunundan tam razı deyiləm. Fikrimcə, qışda heyəti gücləndirmək lazımdır. Təxminən Kovaçiç, yaxud Ernanes kimi hücumu gücləndirəcək yarımmüdafiəçiyə ehtiyacımız var. Ola bilər ki, yüksək səviyyəli hücumçu da alaq".
Qeyd edək ki, "Qarabağ"ın yer aldığı F qrupunda milanlılar 2 turdan sonra 6 xalla lider olsalar da, İtaliya A seriyasında uğursuz çıxış edirlər.
