"Premyer Liqaya yüksələcəyimizdən indi xəbər tutdum. "Kəpəz”in yerinə elitaya biz gəlirik?”
Bunu Sportnet.az-a açıqlamasında futbol üzrə Azərbaycan I Divizionunda çıxış edən "Sabah” komandasının baş məşqçisi Arif Əsədov deyib.
48 yaşlı mütəxəssis bildirib ki, hazırda məsələ barədə detallı məlumata malik olmadığı üçün ətraflı danışa bilməyəcək: "Lisenziyalaşdırma məsələsi ilə rəhbərlik məşğul olub. Ona görə də bu barədə heç nə deyə bilmirəm. Bizim işimiz çıxıb futbolumuzu oynamaqdır. Məsələnin təfərruatı bilinəndən sonra danışmaq olar”.
Qeyd edək ki, AFFA İcraiyyə Komitəsinin bu gün baş tutan iclasından sonra "Sabah”ın Lisenziyalaşdırma Qrupunun tələblərini yerinə yetirən yeganə I Divizon klubu olduğu açıqlanıb. Paytaxt təmsilçisi Premyer Liqada sonuncu olacağı rəsmiləşən "Kəpəz”i əvəz edəcək.
