"Qarabağ" klubundan ayrılan futbolçu Arif Daşdəmirovun yeni komandası böyük ölçüdə müəyyənləşib.
Sportnet.az-ın əldə etdiyi məlumata görə, 31 yaşlı müdafiəçinin "Sumqayıt"a transferi gündəmdədir. Artıq tərəflər arasında danışıqlara başlandığı və ilkin razılığın əldə olunduğu bildirilir.
"Sumqayıt"ın baş məşqçisi Nazim Süleymanov Sportnet.az-a açıqlamasında Dağıstan əsilli cinah oyunçusu ilə maraqlandıqlarını təsdiqləyib: "Daşdəmirov təcrübəli oyunçudur. Bəli, onunla maraqlanırıq. Amma hələ vaxtımız var, transferlərdə çox da tələsmirik. Daşdəmirovun "Sumqayıt"a keçidi mümkündür".
Qeyd edək ki, Arif Daşdəmirov əvvəllər "Şahdağ" (Qusar), "MKT-Araz", "Masallı", "Qəbələ" və "İnter" klublarında, eləcə də 2012 - 2016-cı illərdə Azərbaycan millisində forma geyinib.
