İngiltərə "Bolton"u tamamilə ləğv olma təhlükəsindən qurtulub.
Sportnet.az-ın məlumatına görə, klub "Football Ventures Limited"ə satılmasına dair müqavilə bağlayıb.
Daha əvvəl İngiltərə Futbol Liqası (EFL) "Bolton"a 27 avqust Bakı vaxtı ilə saat 20:00-dək vaxt verib. Lakin daxili administrasiya klubun problemlərini həll edə bilməyib. Sonradan EFL yeni sahibkar axtarışı üçün iki həftəlik müddətə də razı olub.
1874-cü ildə yaradılmış "Bolton" dünyanın ən qədim futbol liqasının əsasını qoyan 12 klubdan biridir. Bu komanda Premyer Liqanı 2012-ci ildə tərk edib və hazırda III Divizionda 23-cü pillədə qərarlaşıb. "Bolton" İngiltərə Kubokunun 4 qat sahibi və ölkə Super Kubokunun qalibi olub. Klub bu mövsümə 12 cərimə xalı ilə başlayıb. İlk 4 matçında klub 0:12 top fərqi ilə 1 xal toplayıb.
