Çempionlar Liqasında 1/4 final mərhələsinin daha 2 iştirakçısı müəyyənləşib.
Sportnet.az-ın məlumatına görə, İngiltərənin "Liverpul" və Fransanın PSJ klubları növbəti raunda vəsiqə qazanıblar.
Mersisaydlılar Macarıstanın paytaxtı Budapeştdəki "Puşkaş Arena"da Almaniya "Leyptsiq"ini 2 cavabsız qolla məğlub ediblər. Qolları 70-ci dəqiqədə Məhəmməd Salah, 4 dəqiqə sonra isə Sadio Mane vurublar. Premyer Liqa təmsilçisi bu stadionda keçirilmiş ilk görüşdə də rəqibinə 2:0 hesabı ilə qalib gəlmişdi.
PSJ isə İspaniya "Barselona"sını mübarizədən kənarlaşdırıb. Səfərdə Kataloniya təmsilçisi üzərində 4:1 hesablı qələbə qazanan parislilər cavab oyununda da güclü rəqibinə uduzmayıb - 1:1. Meydan sahiblərindən Kilian Mbappe, qonaqlardan isə Lionel Messi fərqlənib. Argentinalı hücumçu ilk hissənin əsas vaxtına əlavə olunmuş 3-cü dəqiqədə penaltidən yararlana bilməyib.
Qeyd edək ki, daha əvvəl Almaniyanın "Borussiya" (Dortmund) və Portuqaliyanın "Portu" klubları 1/4 finala adlayıblar. 1/8 finalın digər 4 matçı 16 - 17 martda olacaq.
-------------------------------
Bu gün UEFA Çempionlar Liqasında 1/8 final mərhələsinin daha 2 cavab oyunu keçiriləcək.
Sportnet.az-ın məlumatına görə, İngilətərə "Liverpul"u ilk matçda 2:0 hesabı ilə qalib gəldiyi Almaniya "Leyptsiq"ini pandemiya səbəbindən Macarıstanın paytaxtı Budapeştdəki "Puşkaş Arena"da qəbul edəcək. Komandalar arasında birinci görüş də bu stadionda baş tutub.
Mersisaydlıların heyətində Vircil van Deyk, Co Qomes və Cordan Hendersonun zədə səbəbindən meydana çıxmayacağı dəqiqdir. Ozan Kabak və Roberto Firminonun oynaması isə sual altındadır. Bundesliqa təmsilçisində isə Anhelinyo və Konrad Laymer zədəli olduqları üçün oyunu buraxacaqlar. Həmçinin Villi Orban da komandasına kömək etməyə bilər.
Digər matçda isə PSJ Fransada İspaniya "Barselona"sı ilə münasibətlərinə aydınlıq gətirəcək. Kataloniyadakı görüşdə rəqibini 4:1 hesabı ilə məğlub edən Paris təmsilçisi 1/4 finala daha yaxındır. Meydan sahiblərinin heyətində Neymar, Moyze Kin və Serxio Riko zədə üzündən oynamayacaqlar. Tilo Keryer və Alessandro Florentsinin isə meydana çıxıb-çıxmayacaqları bilinmir. Qonaqlardan isə Jerar Pike, Ronald Arauxo, Serci Roberto, Filippe Koutinyo və Ansu Fati eyni səbəbdən bu qarşılaşmada forma geyinə bilməyəcəklər.
UEFA Çempionlar Liqası
1/8 final mərhələsi
Cavab görüşləri
10 mart
24:00. "Liverpul" (İngiltərə) - "Leyptsiq" (Almaniya) - 2:0
Qollar: Məhəmməd Salah, 70, Sadio Mane, 74
İlk oyun - 2:0
24:00. PSJ (Fransa) - "Barselona" (İspaniya) - 1:1
Qollar: Kilian Mbappe, 31 (penalti) - Lionel Messi, 37
İlk oyun - 4:1
Qeyd edək ki, 1/4 finalın iki iştirakçısı artıq məlumdur. Almaniyanın "Borussiya" (Dortmund) və Portuqaliyanın "Portu" klubları növbəti raunda vəsiqə qazanıblar. 1/8 finalın digər 4 matçı isə 16 - 17 martda olacaq.
