
Futbol üzrə Azərbaycan Premyer Liqasında XXIII turun növbəti görüşü "Sumqayıt" və "Qəbələ" komandaları arasında keçirilib.
Sportnet.az-ın məlumatına görə, "Kapital Bank Arena"da təşkil olunmuş qarşılaşma meydan sahiblərinin qələbəsi ilə yekunlaşıb - 2:0.
Qonaq komanda 38-ci dəqiqədə aparıcı futbolçusu Asif Məmmədovu zədə üzündən itirdikdən sonra çətinliklə üzləşib. "Sumqayıt"ın ardıcıl hücumları ikinci hissədə bəhrəsini verib. 66-cı dəqiqədə Rəhim Sadıxov uzaqdan zərbə ilə gözəl qola imza atıb. 75-ci dəqiqədə isə Əli Qurbani fərqlənərək,çempionatda 7-ci topunu vurub.
Beləliklə, "Sumqayıt" inamlı qələbə ilə xallarını 32-yə çatdırıb və 3-cü pilləyə yüksəlib. 24 xala malik "Qəbələ" isə 5-ci pillədə qalıb.
Qeyd edək ki, XXIII turun açılış oyununda lider "Qarabağ" səfərdə "Səbail"i yenə bilməyib - 1:1. Tura aprelin 17-də keçiriləcək "Keşlə" - "Sabah" və "Neftçi" - "Zirə" görüşləri ilə yekun vurulacaq.
-------------------------------
Futbol üzrə Azərbaycan Premyer Liqasında XIII tura start verilib.
Sportnet.az-ın məlumatına görə, günün ilk oyununda "Səbail" lider "Qarabağ"ı qəbul edib. "ASCO Arena"dakı qarşılaşma 1:1 hesabı ilə yekunlaşıb.
Meydan sahiblərinin heyətində Amil Yunanov 37-ci dəqiqədə penaltidən hesabı açıb. 42-ci dəqiqədə isə Uroş Matiç Ağdam təmsilçisinin bərabərlik qolunu vurub.
Xallarının sayını 47-yə çatdıran "Qarabağ" liderliyini davam etdirir. "Səbail" isə 21 xalla 6-cı sırada qərarlaşıb.
Qeyd edək ki, günün digər matçında "Sumqayıt" "Qəbələ"ni qəbul edəcək. Tura aprelin 17-də oynanılacaq "Neftçi" - "Zirə" və "Keşlə" - "Sabah" matçları ilə yekun vurulacaq.
------------------
Bu gün futbol üzrə Azərbaycan Premyer Liqasında XXIII tura start veriləcək. Sportnet.az-ın məlumatına görə, ilk oyun günündə 2 qarşılaşma keçiriləcək.
Açılış oyununda 46 xalla turnir cədvəlinə başçılıq edən "Qarabağ" 20 xalla 6-cı pillədə yer alan "Səbail"in qonağı olacaq. Komandalar indiyədək çempionatda 14 dəfə üz-üzə gəliblər. Bunların 12-də qonaqlar, birində meydan sahibləri 3 xal qazanıb. Bir görüşdə isə heç-heçə qeydə alınıb. Topların fərqi də Ağdam təmsilçisinin xeyrinədir - 25:2. Texniki nəticə nəzərə alınmasa, “Səbail” rəqibinə qalib gəlməyib. “Qarabağ” bütün oyunlarda qol vurub.
Günün son matçı Sumqayıtda olacaq. 29 xalla 4-cü sırada qərarlaşan şəhərin eyniadlı təmsilçisi özündən 5 xal az toplayan və bir pillə aşağıda yer alan "Qəbələ" ilə münasibətlərinə aydınlıq gətirəcək.
Əvvəlki 34 görüşün 20-də əyalət klubu, 4-də isə "gənclik şəhəri" təmsilçisi qələbə qazanıb. Digər 10 matç isə heç-heçə yekunlaşıb. Topların fərqində qonaqların 56:25 üstünlüyü var. “Qəbələ” son 5 görüşdə meydanı qolsuz və xalsız tərk etməyib. “Sumqayıt” son 6 ev matçında yalnız bir dəfə qalib gəlib.
Azərbaycan Premyer Liqası
XXIII tur
16 aprel (cümə)
18:00. “Səbail” – “Qarabağ” - 1:1
Qollar: Amil Yunanov, 38 - Uroş Matiç, 42
Hakimlər: Əliyar Ağayev, Akif Əmirəli, Zeynal Zeynalov, Rövşən Rəcəbov
Hakim-inspektor: Rövşən Əhmədov
AFFA nümayəndəsi: Eldəniz Musayev
“ASCO Arena”.
20:15. “Sumqayıt” –“Qəbələ” - 2:0
Qollar: Rəhim Sadıxov, 66. Əli Qurbani, 75
Hakimlər: Vüqar Həsənli, Cavanşir Yusifov, Nahid Əliyev, Kamranbəy Rəhimov
Hakim-inspektor: Ömər Paşayev
AFFA nümayəndəsi: Ramiz Mustafayev
“Kapital Bank Arena”.
Qeyd edək ki, tura aprelin 17-də oynanılacaq "Neftçi" - "Zirə" və "Keşlə" - "Sabah" matçları ilə yekun vurulacaq.