İngiltərə "Tottenhem"inin qapıçısı Bred Fridel klubla müqaviləsini uzadıb. Sportnet.az-ın klubun rəsmi saytına istinadən məlumatına görə, 43 yaşlı qolkiperin yeni anlaşması 1 il müddətinə nəzərdə tutulub.
Fridel həm də klubun ABŞ-dakı səfiri olacaq.
Bu mövsüm Fridel "Tottenhem"in heyətində müxtəlif turnirlərdə 9 oyun keçirib. ABŞ millisinin sabiq qolkiperi karyerasına 1995-ci ildə Danimarka "Bröndbü"sündə başlayıb. Növbəti il o, Türkiyə "Qalatasaray"ının heyətində 30 matça çıxıb. Ardından Fridel ABŞ-ın "Kolambus Kryu", İngiltərənin "Liverpul", "Blekbern Rovers" və "Aston Villa" komandalarında da forma geyinib. O, hazırkı klubunda 2011-ci ilin yayından çıxış etməyə başlayıb və 50 oyunda qapısından 59 top buraxıb. Lakin Uqo Lyorisin alınmasından sonra təcrübəli qolkiper əsas heyətdəki yerini itirib.
