Futbol üzrə Azərbaycan Premyer Liqasında V turun daha bir oyunu keçirilib.
Sportnet.az-ın məlumatına görə, günün ikinci matçında "Səbail" "Zirə"ni qəbul edib.
"ASCO Arena"dakı qarşılaşma qonaqların 2:1 hesablı qələbəsi ilə yekunlaşıb. 16-cı dəqiqədə "Zirə"nin gürcüstanlı hücumçusu Davit Volkov Camal Araqonun səhvindən sonra hesabı açıb. 26 yaşlı forvard 40-cı dəqiqədə özünün və komandasının ikinci qoluna imza atıb.
5 dəqiqə sonra Yurgen Qoca hesab arasındakı fərqi azaldıb. İkinci yarıda komandaların bir neçə cəhdi olsa da, görüşdə başqa qol vurulmayıb.
Qələbə sayəsində xallarının sayını 8-ə çatdıran "qartallar" üçüncü pilləyə yüksəlib. "Dənizçilər" isə 6 xalla 4-cü sıradadır.
Qeyd edək ki, günün ilk oyununda "Qarabağ" səfərdə "Keşlə" ilə heç-heçə edib - 1:1. Tura sentyabrın 26-da oynanılacaq "Sabah" - "Neftçi" və "Sumqayıt" - "Qəbələ" matçları ilə yekun vurulacaq.
----------------------------------------------------------------------
Futbol üzrə Azərbaycan Premyer Liqasında V tura start verilib.
Sportnet.az-ın məlumatına görə, açılış oyununda "Qarabağ" "Keşlə"nin qonağı olub. "ASK Arena"da keçirilən görüş 1:1 hesablı heç-heçə ilə başa çatıb.
Matçdan öncə Vətən müharibəsinin ildönümü yad edilib. Ağdam klubu meydana hərbi geyimdə çıxıb. Futbolçular isə üzərində "Qəhrəmanları olan Vətənin bayrağı enməz" şüarı yazılmış pankart açıblar. Daha sonra Dövlət Himni səsləndirilib, şəhidlərin xatirəsi 1 dəqiqəlik sükutla anılıb.
Oyuna gəlincə, start fitindən sonra dərhal irəliyə atılan "Qarabağ"ın çoxsaylı hücumları 20-ci dəqiqədə bəhrəsini verib. Abdullah Zubir Filip Ozobiçin künc nöqtəsindən ötürdüyü topu başla qapıdan keçirib. İlk hissənin sonlarında paytaxt təmsilçisinin baş məşqçisi Sənan Qurbanov texniki zonadan qovulub. 41 yaşlı mütəxəssis baş hakim Fərid Hacıyevin qərarına sərt şəkildə etiraz etdiyi üçün ikinci sarı vərəqə ilə meydandan kənarlaşdırılıb. Beləliklə, birinci yarı qonaqların minimal hesablı üstünlüyü ilə başa çatıb.
İkinci hissədə tamamilə müdafiəyə çəkilən "Keşlə" əks hücumların birində tarazlığı bərpa edib. 71-ci dəqiqədə müdafiədəki boşluqdan istifadə edən Aldair Neto Şahruddin Məhəmmədliyevlə üzbəüz dueldən qalib ayrılıb. Anqolalı hücumçu topu qapıçının başı üzərindən tora qovuşdurub. Buraxılan qoldan sonra "köhlən atlar" təzyiqi artırsalar da, bu, nəticədə öz əksini tapmayıb və "Keşlə" mövsümdə ilk xalını qazanıb. Xallarını sayını 11-ə çatdıran "Qarabağ" liderliyə yüksəlib. Bakı klubu isə "Sabah"la birlikdə 7-8-ci yerləri bölüşdürür.
Qeyd edək ki, günün ikinci oyununda "Səbail" "Zirə"ni qəbul edəcək. Tura sentyabrın 26-da oynanılacaq "Sabah" - "Neftçi" və "Sumqayıt" - "Qəbələ" matçları ilə yekun vurulacaq.
----------------------------------------------
Bu gün Premyer Liqada V tura start veriləcək.
Sportnet.az-ın məlumatına görə, ilk oyun gününün hər iki qarşılaşması Bakıda keçiriləcək. Günün ilk matçında 10 xalla zirvəyə şərik olan "Qarabağ" xalsız və son pillədə yer alan "Keşlə"nin qonağı olacaq. "ASK Arena"dakı matçı gənc referi Fərid Hacıyev idarə edəcək.
Komandalar indiyədək ölkə çempionatında 66 dəfə üz-üzə gəliblər. Bu oyunların 13-də meydan sahibləri, 31-də isə qonaqlar qələbə qazanıb. 22 görüşdə qalib müəyyənləşməyib. Topların nisbəti də Ağdam klubunun xeyrinədir - 85:42. “Qarabağ” son 11 oyunda rəqibinə uduzmayıb. “Keşlə”nin son iki ev matçı heç-heçə başa çatıb.
Günün son oyunu "Səbail" və "Zirə" komandaları arasında gerçəkləşəcək. "ASCO Arena"dakı matçın baş hakimi Kamal Umudlu olacaq. Hazırda "dənizçilər" 6 xalla 4-cü, rəqibindən 1 xal az toplayan "qartallar" isə 6-cıdır.
Bunadək baş tutmuş 15 qarşılaşmanın 8-i qonaqların, 3-ü meydan sahiblərinin xeyrinə başa çatıb, 4 görüş bərabərliklə yekunlaşıb. "Zirə"nin vurduğu 19 qola "Səbail" 8 topla cavab verib. “Zirə” son 6 qarşılaşmada uduzmayıb. “Səbail” isə son 3 görüşdə qol vurmayıb.
25 sentyabr (şənbə)
17:00. “Keşlə” – “Qarabağ” - 1:1
Qollar: Aldair Neto, 71 - Abdullah Zubir, 20
Hakimlər: Fərid Hacıyev, Rahil Ramazanov, Kamran Bayramov, İnqilab Məmmədov
Hakim-inspektor: Asim Xudiyev
AFFA nümayəndəsi: Məmmədəli Məmmədov
“ASK Arena”.
19:15. “Səbail” – “Zirə” - 1:2 (İKİNCİ HİSSƏ)
Qol: Yurgen Qoca, 45 - Davit Volkov, 16. 40
Hakimlər: Kamal Umudlu, Cavanşir Yusifov, Müslüm Əliyev, Rəşad Əhmədov
Hakim-inspektor: İmanxan Sultani
AFFA nümayəndəsi: İlham Əliyev
“ASCO Arena”.
Qeyd edək ki, tura sentyabrın 26-da oynanılacaq "Sabah" - "Neftçi" və "Sumqayıt" - "Qəbələ" oyunları ilə yekun vurulacaq.
