UEFA Çempionlar Liqasında 1/8 final mərhələsinin ilk görüşlərinə yekun vurulub.
Sportnet.az-ın məlumatına görə, son oyun günündə 2 qarşılaşma keçirilib.
Gecənin maraqla gözlənilən matçı İspaniyada Madrid "Atletiko"su ilə İngiltərənin "Mançester Yunayted" komandası arasında olub. "Vanda Metropolitano" stadionunda oynanılan görüş heç-heçə başa çatıb. Oyunda ilk qolu 7-ci dəqiqədə meydan sahiblərinin hücumçusu Joao Feliks vurub. Qonaqlar 80-ci dəqiqədə hesabı bərabərləşdiriblər. Antoni Elanqa "qırmızı şeytanlar"ı məğlubiyyətdən xilas edib.
Digər matçda isə Niderland "Ayaks"ı Portuqaliyada "Benfika" ilə qarşılaşıb. "Eştadiu du Benfika" stadionundakı görüşdə də qalib müəyyənləşməyib - 2:2. Matçda hesabı 18-ci dəqiqədə qonaqlar açıblar. Duşan Tadiç adını tabloya yazdırıb. 26-cı dəqiqədə meydan sahibləri tarazlığı bərpa ediblər. Sebastyen Allye avtoqol müəllifi olub. Kot d İvuarlı hücumçu 3 dəqiqə sonra ikinci qolu vurub. 28 yaşlı forvard bu dəfə rəqib qapısına yol tapıb. Qarşılaşmada son nöqtəni isə 72-ci dəqiqədə "Benfika"nın ukraynalı hücumçusu Roman Yaremçuk qoyub.
Komandalar arasında cavab qarşılaşmaları martın 15-də keçiriləcək.
-------------------------------
Bu gün UEFA Çempionlar Liqasında 1/8 final mərhələsinin ilk görüşlərinə yekun vurulacaq.
Sportnet.az-ın məlumatına görə, son oyun günündə 2 qarşılaşma keçiriləcək.
Gecənin maraqla gözlənilən matçı İspaniyada Madrid "Atletiko"su ilə İngiltərənin "Mançester Yunayted" komandası arasında olacaq. "Vanda Metropolitano" stadionunda oynanılacaq görüşü rumıniyalı FIFA referisi Ovidiu Hatseqan idarə edəcək.
Vacib oyun öncəsi meydan sahiblərinin heyətində ciddi itkilər var. Antuan Qrizmann və Daniel Vass zədə, Yannik Karrasko isə cəza səbəbindən oynamayacaq. Xose Mariya Ximenesin isə meydana çıxması sual altındadır. Qonaqlarda isə eyni sözləri Erik Bayi və Edinson Kavani haqqında söyləmək olar.
Digər matçda isə Niderland "Ayaks"ı Portuqaliyada "Benfika" ilə qarşılaşacaq. "Eştadiu du Benfika" stadionundakı görüşün baş hakimi sloveniyalı Slavko Vinçiç olacaq.
Lissabon təmsilçisində Haris Seferoviç, Amsterdam klubunda isə Marten Stekelenburq və Şon Klayber zədə səbəbindən oyunu buraxacaq.
Komandalar arasında cavab qarşılaşmaları martın 15-də keçiriləcək.
UEFA Çempionlar Liqası, 1/8 final
İlk oyunlar
23 fevral
00:00. "Atletiko" (İspaniya) - "Mançester Yunayted" (İngiltərə) - 1:1
Qollar: Joao Feliks, 7 - Antoni Elanqa, 80
Baş hakim: Ovidiu Hatseqan (Rumıniya)
00:00. "Benfika" (Portuqaliya) - "Ayaks" (Niderland) - 2:2
Qollar: Sebastyen Allye, 26 (avtoqol). Roman Yaremçuk, 72 - Duşan Tadiç, 18. Sebastyen Allye, 29
Baş hakim: Slavko Vinçiç (Sloveniya)
Qeyd edək ki, 1/8 finalın ilk 6 görüşündə İngiltərənin "Mançester Siti" klubu Portuqaliyada "Sportinq"ə 5:0, PSJ Fransada İspaniya "Real Madrid"inə 1:0, İngiltərə "Liverpul"u İtaliyada "İnter"ə 2:0, "Çelsi" İngiltərədə Fransanın "Lill" klubuna 2:0 hesabı ilə qalib gəlib, Almaniya "Bavariya"sı Avstriyada "Zaltsburq"la, İtaliya "Yuventus"u isə İspaniyada "Vilyarreal"la eyni hesablı heç-heçəyə razılaşıb - 1:1.
