İngiltərənin "Çelsi” klubu İspaniya "Barselona”sının futbolçusu Sesk Fabreqası transfer etdiyini rəsmən açıqlayıb. Sportnet.az-ın klubun saytına istinadən məlumatına görə, 27 yaşlı yarımmüdafiəçi ilə 5 illik müqavilə imzalanıb.
O, yeni komandasında 4 nömrəli formanı geyinəcək. Fabreqas "Çelsi” nin doğru seçim olduğunu vurğulayıb: "Üç möhtəşəm il keçirdiyim "Barselona”dakı hər kəsə təşəkkür edirəm. "Barsa” mənim uşaqlıq arzum idi. Belə bir möhtəşəm komandada oynadığım üçün hər zaman fəxr edəcəyəm. Premyer Liqada bitməmiş bir işimin olduğunu hiss etdim və fikrimcə, geri qayıtmaq üçün doğru zamandır. Bütün təklifləri dərindən dəyərləndirdim və "Çelsi”nin doğru seçim olduğuna tam inanıram. Kuboklar qazanmaq üçün hiss etdikləri aclıq və istək mənim futbola bağlılığımla uyğunlaşır. Möhtəşəm oyunçulara sahib olan heyəti və baş məşqçiləri var. Bu komandaya tam bağlandım və oynayacağım günü səbirsizliklə gözləyirəm”.
Vaxtilə İngiltərə Premyer Liqasında "Arsenal”ın da şərəfini qorumuş Fabreqas "topçular” barədə isə "Hamı "Arsenal”ın məni transfer etmək üçün prioritetə sahib olduğunu bilir. Amma onlar bu hüquqdan yararlanmamağa qərar verdilər. Ona görə də "topçular”a keçidim gerçəkləşmədi” deyib.
