Futbol üzrə Azərbaycan Premyer Liqasında XXII tura yekun vurulub.
Sportnet.az-ın məlumatına görə, turun son oyununda "Qəbələ" autsayder "Səbail"in qonağı olub. "ASCO Arena"dakı qarşılaşma əyalət klubunun 0:3 hesablı məğlubiyyəti ilə yekunlaşıb. Bu, meydan sahiblərinin 2022-ci ildə ilk qələbəsi olub.
Paytaxt təmsilçisinin heyətində qolları 41-ci dəqiqədə Adil Nağıyev, 67-ci dəqiqədə Nikolas Raysel və 73-cü dəqiqədə İbrahim Aslanlı vurublar.
Bu nəticədən sonra xallarını 14-ə çatdıran "Səbail" sonuncu pillədəki mövqeyində qalıb. "Qəbələ" isə 34 xalla 4-cüdür.
Qeyd edək ki, turun əvvəlki oyunlarında "Neftçi" səfərdə "Şamaxı"ya 2:1, "Sabah" evdə "Zirə"yə 3:1 və "Qarabağ" səfərdə "Sumqayıt"a 3:0 hesabı ilə qalib gəlib.
--------------------------------------
Futbol üzrə Azərbaycan Premyer Liqasında XXII turun daha bir oyunu keçirilib.
Sportnet.az-ın məlumatına görə, çempionatın lideri "Qarabağ" "Sumqayıt"ın qonağı olub. "Kapital Bank Arena"da baş tutan matç "köhlən atlar"ın 3:0 hesablı qələbəsi ilə başa çatıb.
Görüşdə ilk qolu 16-cı dəqiqədə Kadi Borges vurub. İlk hissə bu hesabla başa çatıb. İkinci yarıda da hücumlarını davam etdirən Ağdam klubu 67-ci dəqiqədə Marko Veşoviçin qolu ilə fərqi artırıb. Oyunda son nöqtəni isə Leandro Andrade qoyub. 69-cu dəqiqədə fərqlənən kabo-verdeli yarımmüdafiəçi yekun hesabı müəyyənləşdirib.
Bu qələbədən sonra xallarını 52-yə çatdıran "Qarabağ" zirvədəki yerini möhkəmləndirib və avrokuboklara vəsiqəni təmin edib. 14 xalı olan "Sumqayıt" isə 7-ci pillədə qərarlaşıb.
Qeyd edək ki, ilk oyun günündə "Neftçi" səfərdə "Şamaxı"ya 2:1, "Sabah" isə evdə "Zirə"yə 3:1 hesabı ilə qalib gəlib. Tura bu gün keçiriləcək "Səbail" - "Qəbələ" matçı ilə yekun vurulacaq.
-------------------------------------
Bu gün Azərbaycan Premyer Liqasında XXII turun son iki oyunu keçiriləcək.
Sportnet.az-ın məlumatına görə, günün ilk matçında "Sumqayıt" "Qarabağ"ı qəbul edəcək.
Ağdam klubu 49 xalla liderdirsə, "gənclik şəhəri" təmsilçisi 14 xalla 7-ci pillədə qərarlaşıb. Qurban Qurbanovun baş məşqçi olduğu kollektiv səfər qarşılaşmasında uduzmasa, ardıcıl 10-cu mövsüm avrokuboklara vəsiqə qazanacaq.
Komandalar indiyədək ölkə çempionatlarında 37 dəfə üz-üzə gəliblər. Bunların 27-də "köhlən atlar" qələbə qazanıbsa, 5-də meydan sahibləri 3 xala sevinib. Topların nisbətində də "Qarabağ"ın aşkar üstünlüyü var - 83:18. Ağdamlılar Premyer Liqadakı son 7 matçda rəqibinə uduzmur, "Sumqayıt" isə 3 görüşdə xala həsrətdir.
Tura "Səbail" - "Qəbələ" görüşü ilə yekun vurulacaq. Hazırda "dənizçilər" 11 xalla sonuncu - 8-ci, "qırmızı-qaralar" isə 34 xalla 4-cüdür. Elmar Baxşıyevin baş məşqçi olduğu kollektiv səfər matçında qalib gələcəyi təqdirdə, 3-cü pilləyə yüksələcək.
Premyer Liqasındakı əvvəlki 18 matçın 9-da əyalət klubu, 4-də paytaxt təmsilçisi qələbə qazanıb. Topların nisbətində də "Qəbələ" öndədir - 33:16. "Qırmızı-qaralar" son üç matçda qalib gəlib. Son 4 görüşdə qol vuran komanda üç xal qazanıb.
Azərbaycan Premyer Liqası, XXII tur
10 aprel (bazar)
18:30. “Sumqayıt” – “Qarabağ” - 0:3
Qollar: Kadi Borges, 16. Marko Veşoviç, 67. Leandro Andrade, 69
Hakimlər: Əliyar Ağayev, Zeynal Zeynalov, Akif Əmirəli, Rauf Allahverdiyev
Hakim-inspektor: Asim Xudiyev
AFFA nümayəndəsi: Eldəniz Musayev
Kapital Bank Arena.
20:30. “Səbail” – “Qəbələ” - 3:0
Qollar: Adil Nağıyev, 41. Nikolas Raysel, 67. İbrahim Aslanlı, 73
Hakimlər: Vüqar Həsənli, Cəmil Quliyev, Rəhman İmami, Rəvan Həmzəzadə
Hakim-inspektor: İmanxan Sultani
AFFA nümayəndəsi: Ramiz Mustafayev
ASCO Arena.
Qeyd edək ki, ilk oyun günündə "Neftçi" səfərdə "Şamaxını" 2:1, "Sabah" isə evdə "Zirə"ni 3:1 hesabı ilə üstələyib.
