Avqustun 11-də Tiflisdə İspaniyanın "Barselona" və "Sevilya" komandaları arasında keçiriləcək UEFA Super Kuboku matçının biletləri bu gün Gürcüstan paytaxtında yerli vətəndaşlar üçün satışa çıxarılıb. Prosesi canlı izləyən jurnalist Araz Əhmədovun Sportnet.az-a verdiyi məlumata görə, satış bir çox problemlə müşayiət olunub.
İnternet vasitəsilə onlayn satışı təşkil edə bilməyən Gürcüstan tərəfi kassalarda satışa çıxarılan biletlerin azarkeşlər tərəfindən alınmasını sivil qaydada yoluna qoya bilməyib. Bilet almaq istəyənlər bir gün öncədən Tiflisin Vake parkında çadırlar quraraq, öncədən açıqlandığı kimi, 50 nəfərlik qrupların yaradılmasını gözləyib. Səhər saat 8-də Gürcüstan Futbol Federasiyasının (GFF) əməkdaşları növbəlilik prinsipinə əməl etməyiblər. Onlar 20 minə yaxın futbolsevərdən müəyyən miqdarda pul alaraq, onları qrupların tərkibinə daxil etməyə başlayıblar. Bu zaman basabas yaranıb, polislə azarkeşlər arasında toqquşma olub.
Basırıq zamanı 8 nəfərin halı pisləşib. Onlar təcili tibbi yardım maşını ilə xəstəxanalara çatdırılıb. GFF-nin kassalarda satılacaq biletləri yalnız Gürcüstan vətəndaşlarının ala biləcəklərini açıqlamasına rəğmən, Vake parkında bilet almaq istəyənlər arasında çoxlu sayda Azərbaycan vətəndaşı da olub. Qrupların tərkibinə düşmək istəyən vətəndaşlarımız federasiya əməkdaşlarının rədd cavabı ilə üzləşiblər. Bakıdan ve ölkəmizin digər bölgələrindən Tiflisə axın edən futbolsevərlər bilet əldə edən Gürcüstan vətəndaşlarına yüksək məbləğdə pul təklif edirlər. Buna rüşvət də demək olar. Onlar da oyun zamanı stadionda yer almağa çalışırlar.
Qeyd edək ki, Tiflisdəki Boris Payçadze adına "Dinamo" stadionunda keçiriləcək "Barselona" - "Sevilya" matçı Bakı vaxtı Bakı vaxtı ilə saat 23:45-də başlanacaq.
