"Oyunun belə gedəcəyinə inanmazdım. Azarkeşlərə, media nümayəndələrinə çox sağ ol deyirəm". Sportnet.az-ın məlumatına görə, bunu jurnalistlərə açıqlamasında "Qarabağ"ın futbolçusu Qara Qarayev deyib.
Avropa Liqasının pley-off mərhələsinin "Yanq Boyz"la cavab görüşündən sonra oyun haqda fikirlərini bildirən Qarayev artıq nəticə haqda danışmağın lazım olduğunu deyib: "Çünki futbol bizdən bunu tələb edir. Çalışdıq ki, evimizdə layiqli qələbə qaznaq. İlk oyunda minimal hesabla qalib gəlməyimiz bizi rahatlaşdırmamışdı. Rəqibin ilk dəqiqələrdən azlıqda qalması işimizi asanlaşdırdı. Çətin və mübarizəli oyun oldu. Əzmkar mübarizə apardığı üçün komanda yoldaşlarıma təşəkkür edirəm. Biz bir dəfə qrup hisslərini yaşamışıq. Ötən ilki səhvləri təkrarlamamlı və daha ciddi olmalıyıq".
Qeyd edək ki, iki oyunun nəticəsinə əsasən "Qarabağ" Avropa Liqasının qrup mərhələsinə vəsiqə qazanıb - 1:0; 3:0.
