"Ardıcıl 5-ci oyundur ki, qələbə qazana bilmirik". Sportnet.az-ın məlumatına görə, bunu "Neftçi"nin baş məşqçisi Samir Əliyev AZAL-a 1:2 hesabı ilə uduzduqları Azərbaycan Premyer Liqasının IX tur matçından sonra deyib.
O, oyuna çox bərbad başladıqlarını, ikinci hissədə vəziyyəti öz xeyirlərinə dəyişməyə çalışdıqlarını, hətta qol da vurduqlarını xatırladıb: "Amma oyunun son dəqiqələrində səhvə yol verdik, qapımıza penalti təyin olundu. Rəqib bundan maksimum yararlandı və biz məğlub olduq. Bəlkə də həyatım boyu bu qədər məyus olmamışdım".
Əliyevin sözlərinə görə, çıxış yolu qışa qədər gözləməkdir: "Mən burada qalsam, layiq olmayan futbolçular göndəriləcək. Gənc, təcrübəli futbolçu başa düşməlidir ki, hansı klubda oynayır. Bu formanı geyinirsənsə, mahiyyətini dərk etməlisən”.
