"Neftçi"nin yeni baş məşqçisi Əsgər Abdullayev sələfi Samir Əliyevin qərarını ləğv edib. Sportnet.az-ın məlumatına görə, təcrübəli mütəxəssis Samir Məsimovla Məhəmməd Qurbanovu əsas komandaya qaytarıb.
20 yaşlı yarımmüdafiəçi ilə 23 yaşlı hücumçu "Xəzər Lənkəran"la Azərbaycan Premyer Liqasının XIII tur matçının "18-liy"inə daxil edilib. Onlar ehtiyat oyunçular skamyasında oturacaqlar.
Qeyd edək ki, Samir Məsimovla Məhəmməd Qurbanov oktyabrın 23-də keçirilmiş IX tur matçında peşəkar səviyyələrindən aşağı çıxış etdikləri üçün məşqçilər korpusunun təqdimatına əsasən əvəzedici heyətə göndəriliblər. AZAL-ın 2:1 hesablı qələbə qazandığı həmin qarşılaşmada Qurbanov 46-cı, Məsimov 72-ci dəqiqədə oyundan alınıb.
