Neftçinin Avropa Liqasında III təsnifat mərhələsinin cavab görüşündə Gürcüstan "Çixura"sı ilə qarşılaşacaq "Neftçi" komandası Tiflisə yollanıb. Sportnet.az-ın məlumatına görə, Heydər Əliyev adına Beynəlxalq Hava Limanından komanda üzvləri ilə yanaşı klub prezidenti Sadıq Sadıqov da səfərə çıxıb.
Eyni zamanda klubun istefada olan vitse-prezidenti Tahir Süleymanov və Mətbuat və İctimaiyyətlə Əlaqələr Departamentinin sabiq rəisi Elnur Əşrəfoğlu da komandayla birgə olub. Əvvəlki səfərdə "Koper"lə cavab görüşündə Əşrəfoğlu iştirak etdiyi halda, Süleymanov Sloveniyaya yollanmamışdı.
Qeyd edək ki, avqustun 7-də keçiriləcək "Çixura" - "Neftçi" matçı Bakı vaxtı ilə saat 22:00-da başlanacaq.
