Azərbaycan milli komandasının qapıçısı Kamran Ağayevin Türkiyə "Kayserispor"undakı taleyi yeni baş məşqçidən asılı olacaq. Sportnet.az-ın "İhlas" agentliyinə istinadən məlumatına görə, 29 yaşlı qolkiperlə qışda bağlanılmış yarım illik müqavilə bu gün başa çatır.
Hazırda Ağayevdən əlavə, 12 futbolçu yeni müqavilə təklifi gözləyir. Amma rəhbərlik onların heç biri ilə danışıqlara başlamayıb. Bu isə komandaya yeni baş məşqçinin hələ təyin olunmaması ilə əlaqədardır.
Qeyd edək ki, "Kayserispor" rəhbərliyi komandaya Türkiyə I Liqasında çempionluq qazandırmasına rəğmən, baş məşqçi Cüneyt Dumlupınarla yollarını ayırıb. Hazırda klub prezidenti Hilmi Derinel bir neçə namizədlə danışıqlar aparır. Bunlar Şota Arveladze, Tolunay Kafkas və Məsut Bakkaldır.
