Azərbaycan Şahmat Federasiyası (AŞF), Gənclər və İdman Nazirliyi və Milli Xalça Muzeyinin birgə təşkilatçılığı ilə keçiriləcək “Çempionların savaşı” adlı turnirin heyətində dəyişiklik edilib.
Federasiyanın mətbuat xidmətindən Sportnet.az-a verilən məlumata görə, hindistanlı dünya çempionu Vişvanatan Anand həkimlərin rəyinə əsasən səhhətində yaranan narahatlıqla bağlı səfərə çıxa bilməyəcəyini söyləyib.
Bununla bağlı AŞF-yə müraciət edən Anand növbəti yarışlarda böyük məmnuniyyətlə iştirak edəcəyini söyləyib.
28 - 30 apreldə Azərbaycan Milli Xalça Muzeyində təşkil olunacaq turnirdə Azərbaycan çempionu Rauf Məmmədov özbəkistanlı dünya çempionu Rüstəm Kasımcanova qarşı çıxış edəcək.
Qeyd edək ki, qadınlar arasında ölkə çempionatının qalibi Günay Məmmədzadə həmin turnirdə dünya və Avropa çempionu Antoaneta Stefanova ilə mübarizə aparacaq. “Çempionlar savaşı”nda qalib rapid və blits üzrə turnirlərin cəminə əsasən müəyyənləşəcək.
