Qadın voleybolçular arasında 2018-ci il dünya çempionatının seçmə mərhələsinin Bakıda təşkil olunan E qrupunda bu gün son turun oyunları keçirilib. Sportnet.az-ın məlumatına görə, Azərbaycan milli komandası Yaponiyada baş tutacaq mundiala yeganə vəsiqə uğrunda görüşdə Hollandiya ilə üz-üzə gəlib.
Bu oyunadək hər iki yığma ilk 4 turu qələbə ilə başa vurmuş və 12 xalla şərikli lider idilər. Bugünkü qarşılaşmadan qalib ayrılacaq komanda birbaşa final mərhələsinə vəsiqə qazanacaq, məğlub tərəf isə digər 5 qrupun ikinciləri ilə "pley-off" mərhələsində son 2 vəsiqə uğrunda mübarizə aparmalı olacaqdı. Əvvəlki oyunlarında Azərbaycan millisi Norveç, Ukrayna, Danimarka və İsrailə set vermədən qalib gəlmişdi - 3:0. Hollandiya isə Danimarka və Norveçi "quru hesab"la yendiyi halda, Hollandiya və İsrailə 1 set verərək, qələbə qazanmışdı - 3:1.
Yenə ənənəsinə sadiq qalan Azərbaycan millisi ilk iki setdə ciddi müqavimətlə üzləşsə də, üstün tərəf olub. Bundan sonra rəqibin müqaviməti qırılıb və meydan sahibləri daha bir seti alaraq, görüşü qalibiyyətlə başa vurub - 3:0. Bununla da Faiq Qarayevin baş məşqçi olduğu komanda tarixində 4-cü dəfə dünya çempionatında iştirak hüququna yiyələnib. Hollandiya isə digər 5 qrupda ikinci yeri tutanlarla birgə "pley-off"da yarışacaq.
Qeyd edək ki, son turun digər qarşılaşmalarında İsrail Norveçi 3:1, Ukrayna Danimarkanı 3:0 hesabı ilə yenib. Bu nəticələrdən sonra Azərbaycan 15 xalla 1-ci, Hollandiya 12 xalla 2-ci, Ukrayna 9 xalla 3-cü, İsrail 6 xalla 4-cü, Norveç 3 xalla 5-ci, xalsız Danimarka isə 6-cı yeri tutub.
Dünya çempionatının seçmə mərhələsi
E qrupu
IV tur
15:00. Norveç - İsrail - 1:3 (19:25, 25:15, 17:25, 15:25)
Hakimlər: Bruno Muxa (Xorvatiya), Roberto Boris (İtaliya)
17:30. Azərbaycan - Hollandiya - 3:0 (30:28, 25:22, 25:13)
Hakimlər: Mixail Temelis (Yunanıstan), Saşa Stanisiç (İsveçrə)
20:00. Ukrayna -Danimarka - 3:0 (25:14, 25:16, 25:18)
Hakimlər: Sabine Vitte (Almaniya), Sanya Mikloşiç (Sloveniya).
