Fransada keçiriləcək AVRO-2016-nın final mərhələsinə daha 2 vəsiqənin sahibi müəyyənləşib. Sportnet.az-ın məlumatına görə, Portuqaliya və Şimali İrlandiya yığmaları öz qruplarının hazırkı lideri kimi bu vəsiqələrə sahib olublar.
İ qrupunda yer alan Kriştianu Ronaldunun komandası Danimarka üzərində minimal hesablı qələbə sayəsində istəyinə çatıb. Hazırda iki ölkə yığması arasında xal fərqi 6-dır. Şimali İrlandiya isə tarixində ilk dəfə Avropa çempionatının final mərhələsində mübarizə aparacaq. Britaniyalılar 2004-cü ilin qitə çempionu, hazırda çətin günlərini yaşayan Yunanıstanı 3:1 hesabı ilə yenərək, xallarını 20-yə, 3-cü pillədə gedən Macarıstanla xal fərqini isə 4-ə çatdırıblar.
Beləliklə, VIII turun ilk oyun günündən sonra final mərhələsinə vəsiqələrin sayı 7-yə çatıb. Daha öncə təşkilatçı Fransadan əlavə, Çexiya, İslandiya, İngiltərə və Avstriya da AVRO-2016-da iştirak hüququna yiyələnib. Final mərhələsi ilk dəfə 24 ölkənin iştirakı ilə təşkil olunacaq.
