Voleybolçu qadınlar arasında Azərbaycan Super Liqasında növbəti finalçı müəyyənləşib. Sportnet.az-ın məlumatına görə, Voleybol Mərkəzində "Azəryol" və "Lokomotiv" klubları üz-üzə gəlib.
Bu, iki komanda arasında üçüncü yarımfinal görüşü olub. İlk matçda "Lokomotiv" 3:1, ikinci oyunda "Azəryol" 3:0 hesabı ilə qalib gəldiyindən, reqlamentə əsasən, qalib məhz bu gün müəyyənləşməli idi.
Görüş "dəmiryolçular"ın üstünlüyü şəraitində keçib. Nəticədə "Lokomotiv" yenidən 3:1 (25:17, 18:25, 25:12, 25:16) hesabı ilə qalib gələrək, finala yüksəlib. Həlledici qarşılaşmada rəqib "Rabitə" olacaq. 3-cü yer uğrunda görüşdə isə "Azəryol" "Azərreyl"lə qarşılaşacaq.
Qeyd edək ki, oyunlar aprelin 10-da, 12-də və ehtiyac yaranarsa, aprelin 15-də keçiriləcək.
