Azərbaycanı və "Qəbələ” İdman Klubunu (İK) peşəkar boksda təmsil edən Fariz Məmmədov növbəti döyüşünü keçirib. Sportnet.az-ın məlumatına görə, 35 yaşlı idmançı Avropa Azərbaycan Cəmiyyəti, Azərbaycanın Almaniyadakı səfirliyi, Almaniyada Azərbaycan diasporunun dəstəyi ilə təşkil olunan möhtəşəm boks gecəsində rinqə çıxıb.
Bu döyüş mərhum prezident Heydər Əliyevin anadan olmasının 92 illiyinə həsr olunmuş yarış çərçivəsində baş tutub. Mayın 2-də Almaniyada keçirilmiş döyüşdə Məmmədovun rəqibi belaruslu Andrey Abramenko olub. Qarşılaşma reytinq xarakteri daşıyıb. Bunadək çıxdığı 29 döyüşdə 20 qələbəsi, 2 heç-heçəsi, 7 məğlubiyyəti olan rəqiblə döyüşün 10 raund davam etməsi nəzərdə tutulsa da, idmançımız görüşün taleyini vaxtından əvvəl həll edib. Məmmədov 2-ci raundda qalib gəlib. O, buna rəqibini nokauta göndərməklə nail olub.
