Bu gün Bakıda Formula 1 üzrə Avropa Qran Prisi keçiriləcək. Sportnet.az-ın məlumatına görə, pilotların mübarizəsindən əvvəl Açılış Mərasimi baş tutacaq.
Saat 15:45-də trek Azərbaycan mədəniyyətini Formula 1 dəyərləri ilə birləşdirən mərasim start götürəcək. Mərasim 5 rəmz və model vasitəsilə davamlı əlaqə qurmaq üçün müəyyən sujet xətti üzərində birləşən 5 fəaliyyətdən ibarət olacaq.
20 dəqiqəlik nəhəng paradda millətin yeni ruhu ilə birlikdə onun zəngin irsi nümayiş olunacaq. Paradın tam mərkəzində bədii bacarığına görə seçilmiş könüllülər, azərbaycanlı sənətçilər, milli qruplar və beynəlxalq ifaçılardan ibarət 626 nəfərlik heyət yer alacaq.
Paradın ardınca Azərbaycan Dövlət Uşaq Filarmoniyasının qırx (40) nəfərdən ibarət gənc kollektivi tərəfindən Dövlət Himni ifa olunacaq və bundan sonra Formula 1 üzrə Avropa Qran Prisinə start veriləcək.
