Azərbaycan karateçisi İrina Zaretska Hollandiyanın Rotterdam şəhərində keçirilmiş Premyer Liqanın bürünc medalını qazanıb. Sportnet.az-ın federasiyanın rəsmi saytına istinadən məlumatına görə, 68 kq çəki dərəcəsində yer alan ukraynalı legioner 6 görüşdən yalnız yarımfinalda 2 xal fərqi ilə məğlub olub.
O, Maryam Zaquamini (Danimarka) 4:0, Mandi Besselinqi (Hollandiya) 3:0, Kamila Vardanı (Polşa) 1:0, Liza Rassmussonu (İsveç) 6:1 hesabı ilə yendikdən sonra yarımfinalda Güzeliyə Qafurovaya (Qazaxıstan) 1:3 hesabı ilə uduzub. Lakin təsəlliverici görüşdə Zaretska Viktoriya Pillarovanı (Rusiya) 1:0 hesabı ilə məğlub edərək, fəxri kürsünün üçüncü pilləsinə qalxıb.
Qeyd edək ki, Premyer Liqada Azərbaycanı yalnız İrina Zaretska təmsil edib. Ümumilikdə 59 ölkədən 778 karateçi mübarizə aparıb ki, onlardan yalnız 25 ölkə medal qazana bilib. Azərbaycan ümumi hesabda 17 - 25-ci yerləri bölüşüb.
