“Qol vurduğum matçda komandamın qalib gəlməsi məni sevindirir. Cavab görüşündə də yaxşı mübarizə aparıb kubokun finalına yüksəlməyi hədəfləyirik”.
Bu sözləri “Sabah” komandasının futbolçusu Pavol Şafranko səfərdə "Neftçi"ni 2:1 hesabı ilə məğlub etdikləri Azərbaycan Kubokunun 1/2 final mərhələsinin ilk oyunundan sonra Sportnet.az-a açıqlamasında deyib.
31 yaşlı hücumçu komandasının 21-ci matçında 40-cı qolunu vurduğu üçün özünü xoşbəxt hiss etdiyini bildirib: “Fikrimcə, azarkeşlər üçün çox yaxşı oyun oldu. İlk yarıda şanslar 50/50-yə idi. Həm rəqib, həm də bizim qapımız qarşısında təhlükəli epizodlar oldu.
İkinci hissədə isə biz daha yaxşı oyun göstərdik. Bunun nəticəsində layiqli qələbə qazandıq”.
Sloveniyalı forvard mərhələni adlayacaqları halda, “Araz-Naxçıvan” - “Qarabağ” cütünün hər hansı birinə rəqib olmağa hazır olduqlarını vurğulayıb: “Növbəti görüşün vaxtına hələ var. Yaxşı hazırlaşacağıq, mərhələni keçəcəyimizə inanırıq. Bilmirik, rəqibimiz kim olacaq. Amma kuboku əldə etmək üçün əlimizdən gələni edəcəyik. Əsas hədəfimiz kuboku qazanıb, Avropa Liqasına yollanmaqdır”.
Qeyd edək ki, “Sabah” və “Neftçi” arasında Azərbaycan Kubokunun 1/2 final mərhələsinin cavab oyunu aprelin 23-də “Bank Respublika Arena”da keçiriləcək.
