Azərbaycanın 15 yaşadək futbolçulardan ibarət millisinin üzvü Nazim Əliyev Serbiya "Srvena Zvezda"sına keçib.
Sportnet.az xəbər verir ki, 15 yaşlı hücumameylli yarımmüdafiəçi Belqrad təmsilçisinin yeniyetmələrdən ibarət komandasında baş məşqçi Slavişa Şuşanın rəhbərliyi altında çıxış edəcək.
Əliyev futbolda ilk addımlarını "Sabah"ın aşağı yaş qruplarından ibarət komandasında atıb. İki il öncə bu klubdan ayrılan istedadlı hücumçu uzun müddət "Srvena Zvezda"nın düşərgəsində olub. Hüquqi və digər prosedurları yoluna qoyduqdan sonra futbolçu Serbiyanın ən köklü iki klubundan biri ilə müqaviləni rəsmiləşdirib. O, Belqrad təmsilçisində oynayacaq ilk azərbaycanlıdır.
Qeyd edək ki, Nazim Əliyev 2024-cü ildən Azərbaycanın U-15 millisinə dəvət alır. O, ötən ilin sentyabrında Belarusun paytaxtı Minskdə keçirilmiş UEFA İnkişaf Turnirində iştirak edib.
