Bu gün Azərbaycan Premyer Liqasında XXII turun son görüşləri keçiriləcək.
Sportnet.az-ın məlumatına görə, ilk oyun "Azersun Arena"da "Turan Tovuz" və "İmişli" komandaları arasında gerçəkləşəcək.
Qarşılaşmanı baş hakim Fərid Hacıyev idarə edəcək.
Hazırda "Turan Tovuz" 21 oyundan 40 xalla 3-cü, "İmişli" 20 xalla 9-cu yerdə gedir. İki komandanın ilk dövrədəki matçında Tovuz təmsilçisi qalib gəlib - 1:0.
Ən böyük maraqla gözlənilən qarşılaşma isə saat 19:00-da Tofiq Bəhramov adına Respublika stadionunda "Qarabağ" və "Sabah" arasında olacaq. Saat 19:00-da start götürəcək matç yeni FIFA referisi Fərid Hacıyevə həvalə edilib.
Hazırda "Sabah" 21 oyundan 52 xalla 1-ci, "Qarabağ" 20 oyundan 45 xalla 2-ci yerdə gedir. Görüşün nəticəsi komandaların turnir cədvəlindəki mövqeyini dəyişdirməyəcək. Lakin meydan sahibləri qalib gəlsələr, xal fərqini 4-ə endirməklə yanaşı, intriqanı ölməyə qoymayacaqlar. Qonaqlar üçün isə qələbə çempionluğa xeyli yaxınlaşma anlamı verəcək.
İki komanda indiyədək 28 dəfə üz-üzə gəlib. Qarşılaşmaların 15-də "Qarabağ" qələbə qazandığı halda, "Sabah" cəmi 3 dəfə qalib gələ bilib. Daha 10 oyun heç-heçə ilə yekunlaşıb. Topların nisbətində Ağdam təmsilçisinin yarıbayarı üstünlüyü var - 51:26. Lakin Masazır komandası son 4 matçda uduzmayıb. Axırıncı 8 oyunda hər iki kollektiv qol vurub.
Qarşılaşmaya tamaşaçı marağı da yüksək səviyyədədir. Son məlumatlara görə, 9 500 bilet sahibini tapıb. Oyunadək 31 minlik stadionun ən azı yarısının dolacağı gözlənilir.
Azərbaycan Premyer Liqası, XXII tur
1 mart (bazar)
16:30. “Turan Tovuz” – “İmişli”
Hakimlər: Fərid Hacıyev, Namiq Hüseynov, Rəhman İmami, Alik Yunusov
VAR: Əli Əliyev
AVAR: Elvin Bayramov
Hakim-inspektor: Ömər Paşayev
AFFA nümayəndəsi: Anar Şixəliyev
“Azersun Arena”
19:00. “Qarabağ” – “Sabah”
Hakimlər: Tural Qurbanov, Asiman Əzizli, Cəmil Quliyev, Əkbər Əhmədov
VAR: Elçin Məsiyev
AVAR: Müslüm Əliyev
Hakim-inspektor: Munis Abdullayev
AFFA nümayəndəsi: Emin Cəfərov
Tofiq Bəhramov adına Respublika Stadionu
Xatırladaq ki, XXII turun əvvəlki qarşılaşmalarında "Kəpəz" "Sumqayıt"ı 3:0, "Zirə" "Araz-Naxçıvan"ı 1:0 hesabı ilə məğlub edib, "Şamaxı" evdə "Neftçi" ilə 2:2, "Qəbələ" isə "Karvan-Yevlax"la 1:1 hesablı heç-heçə edib.
