Bu gün Azərbaycan Premyer Liqasında XXIII turun daha 2 oyunu keçiriləcək.
Sportnet.az-ın məlumatına görə, ilk qarşılaşma Şamaxı şəhər stadionunda gerçəkləşəcək.
Baş hakim Vüqar Həsənlinin idarə edəcəyi matçda "Şamaxı" və debütant "İmişli" komandaları üz-üzə gələcək.
Hazırda bu kollektivlər turnir cədvəlində qonşu pillələrlə qərarlaşıblar. "Şamaxı" 26 xalla 8-ci, "İmişli" 21 xalla 9-cu yerdə gedir. Komandaların ilk 2 dövrədəki oyunlarından birincisində "Şamaxı" 1:0 hesabı ilə qalib gəlib, ikincisi isə qolsuz yekunlaşıb - 0:0. Yəni, “İmişli” hələ qol vurmayıb, “Şamaxı” isə evdə xal itirməyib.
Günün daha bir qarşılaşması isə “Qarabağ” və “Araz-Naxçıvan” arasında olacaq. Tofiq Bəhramov adına Respublika stadionunda saat 19:15-də başlanacaq matçı baş hakim Rəşad Əhmədov idarə edəcək. Hazırda Ağdam komandası 21 oyundan 46 xalla 2-ci, Naxçıvan təmsilçisi 22 oyundan 33 xalla 5-ci yerdə gedir.
İki kollektivin əvvəlki 14 görüşünün 10-da "Qarabağ", 3-də "Araz-Naxçıvan" qələbə qazanıbsa, daha bir matç heç-heçə ilə yekunlaşıb. Topların nisbətində də Qurban Qurbanovun baş məşqçi olduğu kollektiv xeyli öndədir - 36:14.
“Qarabağ” son 6 oyunda qalib gəlib. Axırıncı iki qarşılaşmada 5 qol vuran Ağdam klubu bütün matçlarda rəqib qapısına yol tapıb.
Azərbaycan Premyer Liqası, XXIII tur
8 mart (bazar)
15:00. “Şamaxı” – “İmişli”
Hakimlər: Vüqar Həsənli, Pərvin Talıbov, Tərlan Talıbzadə, Emin Əliyev
VAR: Tural Qurbanov
AVAR: Asiman Əzizli
Hakim-inspektor: Ceyhun Haşımov
AFFA nümayəndəsi: Elçin Mehtiyev
Şamaxı şəhər stadionu
19:15. “Qarabağ” – “Araz-Naxçıvan”
Hakimlər: Rəşad Əhmədov, Elşad Abdullayev, Kərim Zeynalov, Kamranbəy Rəhimov
VAR: Rauf Cabarov
AVAR: Kamran Bayramov
Hakim-inspektor: İmanxan Sultani
AFFA nümayəndəsi: Seymur Səlimli
Tofiq Bəhramov adına Respublika Stadionu
Qeyd edək ki, XXIII turun açılış matçında "Karvan-Yevlax" evdə "Sumqayıt"la heç-heçə edib - 1:1. Turun son 3 görüşü 9-10 martda keçiriləcək.
