Azərbaycan Premyer Liqasında XII turun "İnter”lə noyabrın 9-da keçirilmiş oyunundan sonra 3 günlük istirahətə buraxılan "Qəbələ” hazırlıqları bu gün bərpa edəcək. Sportnet.az-ın klubun rəsmi saytına istinadən məlumatına görə, "qırmızı-qaralar” Qəbələ şəhər stadionunda bir araya gələrək, axşam məşqini gerçəkləşdirəcək.
Roman Qriqorçukun komandası məşqlərini elə bu arenada davam etdirəcək. Milli komandaların oyunları ilə əlaqədar yaranan qısa fasilədə vətəninə yollanan legionerlər də artıq qayıdıblar və komanda ilə birgə məşq keçəcəklər. Yığmaların düşərgəsində olan oyunçular isə məşqə qatılmayacaq. Onlar XIII turunun "Sumqayıt”la matçının hazırlıqlarına millidən qayıtdıqdan sonra qoşulacaqlar.
Qeyd edək ki, "Qəbələ” növbəti oyununu noyabrın 21-də "Kapital Bank Arena”da keçirəcək.
