Azərbaycan Premyer Liqasının cari mövsümündə baş məşqçi dəyişikliklərindən sonra tendensiya müşahidə olunur. Sportnet.az-ın məlumatına görə, yeni baş məşqçilər çempionatdakı ilk oyunlarında adətən qələbə üzünə həsrət qalırlar.
Bu, "Neftçi”nin yeni baş məşqçisi Vəli Qasımovda da olub. 47 yaşlı mütəxəssisin AZAL-la səfər oyununa təsadüf edən siftəsi 1:1 hesablı bərabərliklə nəticələnib. O, təkcə "Neftçi”də yox, ümumiyyətlə, Azərbaycan çempionatında debüt edib.
"Rəvan” Emin Quliyevlə yollarını ayırandan sonra Bəhmən Həsənovun rəhbərliyi altında Premyer Liqadakı ilk matçında səfərdə "İnter”ə uduzub – 0:2. Aqil Məmmədovu əvəzləyən Samir Abasov "Sumqayıt”la ilk çempionat matçında da "İnter”ə rəqib olub. Ancaq bu, ev matçı idi və 1:1 hesabı ilə yekunlaşıb. Yunis Hüseynovun gedişindən sonra "Xəzər Lənkəran”ın "sükanı arxası”na keçən Elbrus Məmmədov debütdə "Rəvan”la evdə qolsuz bərabərliyə qalıb.
Yalnız "Neftçi”nin əvvəlki baş məşqçisi Əsgər Abdullayev qələbə ilə başlaya bilib. Bu, "Xəzər Lənkəran”la səfər oyununda baş verib - 2:0. Düzdür, Qasımov da debütdə Lənkəran təmsilçisini həmin hesabla yenib. Ancaq bu, kubok matçı idi. Həm Abdullayevin, həm də Qasımovun futbolçu karyerasında "Neftçi” mühüm yer tutsa da, onlar yalnız cari mövsümdə baş məşqçi işləyə biliblər.
Vəli Qasımov "Neftçi”nin AZAL-la cari mövsümdəki matçlarında "tilsim"i da qıra bilməyib. Bu da "təyyarəçilər”i məğlub etməyi bacarmamaqdan ibarətdir. Maraqlıdır ki, "Neftçi” Tərlan Əhmədovun komandasına qarşı müxtəlif baş məşqçilərin rəhbərliyi altında çıxıb. Samir Əliyev keçmiş komanda yoldaşından "AZAL Arena”da 1:2, Əsgər Abdullayev keçmiş tələbəsindən "Bakcell Arena”da 0:1 hesablı məğlubiyyət alıb. Qasımov millidəki keçmiş komanda yoldaşı ilə görüşdə də məğlub durumda olub. Lakin o, sonda heç-heçə edə bilməklə təsəlli tapa bilər. Yeri gəlmişkən, onlar futbolçu karyeraları boyu rəqib olmasalar da, məşqçi kimi yolları kəsişib. Qasımov U-19-da baş məşqçi olanda Əhmədov köməkçisi olub.
Qeyd edək ki, Premyer Liqada bu mövsüm baş məşqçi dəyişikləri hazırda turnir cədvəlində son 4 yeri tutan komandada olub.
