Bütün dünyanın böyük səbirsizliklə gözlədiyi növbəti "El Klasiko” baş tutub. Sportnet.az-ın məlumatına görə, "Barselona” ilə "Real” arasında sayca 231-ci oyun maraqlı, gərgin mübarizə ilə yadda qalıb.
"Kan Nou"dakı matç madridlilərin 2:1 hesablı əzmkar qələbəsi ilə nəticələnib. Oyunda hər 3 qol fasilədən sonra vurulub. "Barselona”nın müdafiəçisi Xerard Pike ikinci hissənin əvvəlində künc zərbəsindən sonra başla hesabı açsa da, bu, komandasının son sevinci olub. Əvvəlcə Kərim Benzama hesabı bərabələşdirib. Fransalı hücumçu "Real Madrid”in "Kamp Nou”dakı "El Klasiko”larda 100-cü qolunun müəllifi kimi tarixə düşüb.
Qonaqlar sona 7 dəqiqə qalmış qırmızı vərəqə alan kapitanı Serixo Ramosu itirib. Bundan sonra "Barselona”nın qələbə topıunu vuracağı gzlənilsə də, əksinə olub. "Real Madrid” azlıqda qalmasına baxmayaraq qələbəni qopara bilib. Komandanın lideri Kriştianu Ronaldu "Ela Klasiko”da yubiley – 16-cı qolunu vurub. "Barselona" son saniyələrdə məğlubiyyətdən xilas olmağa yaxın olsa da, ikinci hissədə meydana çıxan türkiyəli futbolçu Arda Turan real şansı qaçırıb.
Bununla da yanvardan "Real Madrid”i çalışdıran Zinəddin Zidan baş məşqçi kimi ilk "El Klasiko"sunu qələbəylə qeyd edib. "Kral klubu" "Barselona” ilə derbidə həm 93-cü qələbəsini qazanıb, həm də əzəli rəqibinin ümumiyyətlə, 39 oyundur davam edən məğlubiyyətsiz seriyasına son qoyub.
Qeyd edək ki, "Barselona”nın əfsanəvi futbolçusu və baş məşqçisi olmuş Yohan Kroyffun xatirəsi həm oyundan əvvəl, həm də 14-cü dəqiqədə (karyerası boyu həmin nömrəli formanı daşıyıb) yad olunub.
"Barselona": Klaudio Bravo, Dani Alves, Xerard Pike, Xavyer Maskerano, Jordi Alba, Serxio Buskets, Andres İnyesta, İvan Rakitiç, Lionel Messi, Luis Suares, Neymar
Ehtiyat oyunçular: Ter Steqen, Tomas Vermalen, Arda Turan, Rafinya, Mark Bartra, Munir Əl Haddadi, Serxi Roberto
"Real Madrid”: Keylor Navas, Dani Karvaxal, Pepe, Serxio Ramos, Marselu – Kazemiru, Toni Kroos, Luka Modriç – Qaret Beyl, Kriştianu Ronaldu, Kərim Benzema
Ehtiyat oyunçular: Kiko Kasilya, Naço Fernandes, Xames Rodriges, Lukas Vaskes, Xese Rodriges, İsko, Danilu
