"Qəbələ" daha bir futbolçusunu icarədən qaytarıb. Sportnet.az-ın məlumatına görə, "qırmızı-qaralar" Sadiq Qiliyevin ardınca digər gənc müdafiəçisi Tellur Mütəllimovu da sıralarına qatıb. Mütəllimov da Quliyev kimi 1995-ci il təvəllüdülür və "Qəbələ" Futbol Akademiyasının yetirməsidir.
21 yaşlı futbolçular ötən mövsüm əsas heyət oyunçuları olduqları "Zirə"nin heyətində Azərbaycan Premyer Liqasının gümüş medalçıları olublar. Özü də Mütəllimov "Qəbələ"də cinah yarımümdafiəçisi, hücumameylli futbolçu kimi oynasa da, "Zirə"də sağ cinah müdafiəçisi kimi çıxış edib. "Qəbələ" isə ötən mövsüm bu mövqedə oynamış Arif Daşdəmirovla Pavel Paşayeylə yollarını ayırıb.
Quliyevlə Mütəllimov "Qəbələ"nın Avropa Liqasına hazırlığa qatılıblar. Onlarla bərabər əvəzedici heyətdə oynamış bir sıra futbolçular məşqlərə cəlb olunublar. Bunlar Murad Musayev, Şirməhəmməd Məmmədov, Sahil Kərimov, Yusif Nəbiyev, Roman Həsənov, Ehtiram Şahverdiyev, Ramil Həsənovdur.
