Avropa Liqasının qrup mərhələsinin ilk oyununda "Qarabağ"ın qonağı olacaq Çexiya "Slovan"ının Bakıya gəlmə vaxtı məlum olub. Sportnet.az-ın məlumatına görə, Çexiya təmsilçisi sentyabrın 13-də paytaxtda olacaq.
Komanda Praqadan çarter reysi ilə yola düşəcək. Təyyarə təxminən 4 saatlıq uçuşdan sonra günün ikinci yarısında Heydər Əliyev adına Beynəlxalq Hava Limanına eniş edəcək.
Qeyd edək ki, sentyabrın 15-də "Dalğa Arena"da keçiriləcək "Qarabağ" - "Slovan" matçı saat 21:00-da başlayacaq. "Qarabağ" J qrupunda "Slovan"la yanaşı "Fiorentina" (İtaliya) və PAOK (Yunanıstan) klubları ilə mübarizə aparacaq.
