"Qəbələ”nin baş məşqçisi Roman Qriqorçuk "Neftçi"ni 8:0 hesabı ilə yendikləri Azərbaycan Premyer Liqasının IV tur matçından sonra mətbuat konfransı keçirib. Sportnet.az-ın məlumatına görə, ukraynalı mütəxəssis əvvəlcə oyun barədə danışıb...
- Razıyıq ki, 3 xal qazandıq. Yaxşı oynadıq. Çox pozitivəm. Biz həmişə yaxşı, qollu nəticəyə köklənirik. Bu, hər dəfə alınmır. Amma bu dəfə bacardıq.
- "Anderlext”lə oyunöncəsi bu cür qələbə komandada arxayınlaşma yarada bilərmi?
- Yaxşı nəticə bizə yaxşı əhval gətirdi. Pozitivik. Belə halda öyrənmək daha yaxşıdı. Düşünürəm ki, bu, futbolçulara yaxşı təsir göstərəcək.
- Komandanızı oyuna necə kökləmişdiniz?
- Birinci hissədə 3:0-dan sonra bir balaca "boşalma” oldu. Amma sonra futbolçularım özlərinə qayıtdılar. Bu cür qələbə yaxşı emosiya yaradır. Ağıllı insanlar bu vəziyyətdən yararlanıb, inkişaf edirlər.
- Sizcə, bu gün "Neftçi” çox zəif idi, yoxsa "Qəbələ” yaxşı oynadı?
- Rəqibin oyununu dəyərləndirmək mən tərəfdən düz çıxmaz. Öz komandamla bağlı onu deyə bilərəm ki, yaxşı oynadıq. Amma bununla bərabər səhvlərimiz oldu.
- "Anderlext”lə oyunöncəsi əsas heyətin heç bir üzvünü qorumadınız. Bunun səbəbini nə ilə izah edərdiniz?
- Bizdə heç nə deyişməmişdi. Heyətdə həmişə layiq olan futbolçulara yer veririk. Bizim bu yanaşmamız heç vaxt dəyişməyəcək.
- Yeni transferlər - Ruslan Qurbanov və Franyiçin çıxışından razı qaldızmı?
- Mən bütün oyunçulardan razı qaldım. Futbolçuları ayırmaq istəmirəm. Düzdü, onların oyununu ayrı-ayrılıqda təhlil edəcəyik. Amma elə məqamlar oldu ki, futbolçular onları düzəltməlidilər.
- "Anderlext”lə səfər matçında hansı nəticəyə ümid edə bilərik?
- Etiraf edim ki, rəqibin oyunlarına artıq baxmışam. Çünki bilirdim ki, "Neftçi” ilə matçdan sonra "Anderlext” haqda məlumat toplamağa vaxtım çatmayacaqdı. Məlumat o qədər çoxdu ki, "Neftçi” ilə oyuna hazırlaşmaqla yanaşı, onların oyunlarını izləmişəm. Amma hələ də onların matçlarına baxmalıyam.
