"Bugünkü uğurumuzun əsas səbəbi yüksək keyfiyyətli kollektiv iş görməyimizdir".
Sportnet.az AFFA-nın saytına istinadən xəbər verir ki, bunu futzal üzrə dünya çempionatının final mərhələsində Mərakeşlə ilk tur matçından sonra Azərbaycan millisinin baş məşqçisi Milton Luis Ziller Junior deyib.
Miltinyo bildirib ki, bu qələbənin əldə edilməsi heç də asan başa gəlməyib: "Həm məşqçi heyəti, həm də oyunçular birlikdə xeyli iş görmüşük və bunun nəticəsində belə qələbə qazana bildik. İndiki məqamda qalibiyyətimizdən zövq almağı bacarmalıyıq, amma unutmaq olmaz ki, dünya çempionatı yenicə başlayıb və biz cəmi 1 oyun keçirmişik. Artıq sabahdan yeni oyuna, yeni rəqibə qarşı mübarizəyə hazırlaşmağa başlayacağıq”.
Qeyd edək ki, millimiz Mərakeşə 5:0 hesabı ilə qalib gəlib. Növbəti görüş sentyabrın 15-də yerli vaxtla saat 18:00-da (Bakı vaxtı ilə 16 sentyabr, saat 03:00) Medellin şəhərindəki "Coliseo Ivan de Bedout" idman kompleksində İspaniya yığmasına qarşı olacaq.
